دووری لە قورئان هۆکاری داڕووخانی موسوڵمانانە

هەڵبژاردنی قسەکردن لەسەر ئەم سکاڵایە لەخۆوە نەبوو، هەروەها بەهۆی گەمەی فیکریەوە نەبووە، بەڵکو لە دووربینییەکی وردەوە سەرچاوەی گرتووە بۆ شیکردنەوەی واقیعی موسوڵمانان و ئەو بارودۆخەی تێی کەوتوون، بە جۆرێک کە خوێنی خۆیان لەسەر سینیی ئاڵتوونی پێشکەش بە دوژمنانیان دەکەن کە بریتین لە ئیبلیس و نەفسی ئەممارە و هێزە ئیستیعمارییەکان کە هەوڵی لێک دابڕینی موسوڵمانان دەدەن و سیمبولی سەربەرزی و شەرەف و کەرامەتیان قورئانە کە ئاوەها نامۆ بووە لە نێوانیاندا، لەبەر ئەوەشە خەفەت لە دڵمدا شەپۆل دەدات.

هۆکاری داڕووخانی ئوممەت و ئەو لاوازی و پووکانەوەیەی تووشی بووە، پشتگوێخستن و دەستنەگرتنە بە حەبلی خودای مەزنەوە کە فەرمانی پێ کردوون دەستی پێوە بگرن و فەرموویەتی: [وَاعْتَصِمُواْ بِحَبْلِ اللّهِ جَمِيعاً وَلاَ تَفَرَّقُواْ](آل عمران: 103) واتە: دەست بە حەبلی خوداوە بگرن و پەرتەوازە مەبن. پێغەمبەریش (صلی الله علیه وآله) ئەو حەبلەی ڕوون کردۆتەوە و فەرموویەتی: من دوو شتی گرانبەهاتان بۆ بەجێ دەهێڵم: گرانبەهای گەورە قورئانە و گرانبەهای بچووک ئەهلی بەیتە. ئەو دوانە حەبلی درێژکراوەی خودان لە نێوان ئێوە و خودادا، ئەگەر دەستی پێوە بگرن گومڕا نابن. لایەکی بە دەستی خوداوەیە و لایەکەی تری بە دەست ئێوەوەیە.^([1])